صواريخ متشابهة تماما

مقال: أبو سامر البصري

ذكرتني الضربة الصاروخية الايرانية الصاعقة المزلزلة البارحة على اهداف امريكية في العراق بصواريخ صدام سابقا

فقد كنت في هيئة التصنيع العسكري وكانت عندنا تجربة لصواريخ جديدة بضرب اهداف في صحراء السماوة
المهم ان الصواريخ لم تصب اهدافها ولا قريبا منها بل بقينا نبحث عنها عدة ساعات ولم نجد لبعضها اثرا
والانكى من ذلك اني سمعت في نشرة الاخبار ان احدهم زف بشرى للرئيس السابق صدام حسين بانتاج صواريخ جديدة اصابت اهدافها بدقة متناهية

رباط السالفة:

صواريخ ايران العالية الدقة واللي خابصينا بيها بل وان امريكا واوربا قلقون من الصواريخ البالستية الايرانية واللي ضربوا العراق بيها البارحة
اثنين ضربوا بيها قاعدة امريكية في اربيل واحد وگع خارج المطار بخمس كيلومترات
والثاني واگع على طريق الموصل يمكن على بعد خمسين كيلومتر

اما اللي ضربوا بيها قاعدة عين الاسد فصلوات عالنبي اللي وگع على مخازن قديمة فارغة وگع
واللي وگع خارج القاعدة وگع

اما احسن اثنين بيهم وگعن قرب هيت على بعد اربعين كيلومتر من القاعدة العراقية اللي بيها امريكان
المهم الامريكان سلامات محد انخدش بيهم لان امريكا عدها خبر ويمكن ايران دازتلهم باص

اما رئيس وزراءنا حفظه الله فهو ساعي بريد
الامريكان يخبروه من يضربونا
والايرانيين يخبروه من يضربونا
وگرة عينك سيدنا حافظت على السيادة العراقية

كل هذا بچفة
وبچفة اخرى يمكن القيادة الايرانية صدگت بقوة ضربتهم وشلون زلزلت عروش امريكا ولذلك امريكا راح ترحل من المنطقة كما وعد قادة ايران شعبهم انتقاما لاغتيال سليماني
اما شلون راح يزيلون اسرائيل من الخارطة فهاي بسيطة ماراح تتورط بيها ايران لكنها راح اتكلف حسن نصرالله بهاي المهمة السهلة

خارج النص:
يمكن الجماعة متفقين اقصد امريكا وايران عالتفاصيل حتى يخلصون من سليماني باعتباره صندوق اسرار اجرام ايران وميليشياتها ويحفظون بعدين لايران بماي وجهها.

وسلمتم

ابو سامر البصري